ក្លឹប Barcelona នៅតែប្តេជ្ញាចិត្តយ៉ាងមុតមាំក្នុងការនាំយក Bastoni មកចូលរួមក្រុម។ យោងតាម ​​Sky Sports បានឱ្យដឹងថា ខ្សែការពារដ៏លេចធ្លោរបស់ក្លឹប Inter រូបនេះ បានក្លាយជាគោលដៅអាទិភាពកំពូលសម្រាប់ក្លឹបយក្សនៅតំបន់ Catalonia ។​ កាលពីទីផ្សារដោះដូរកីឡាកររដូវក្តៅកន្លងទៅ ក្លឹប Barcelona ធ្លាប់បានសង្ឃឹមថានឹងអាចនាំយក Bastoni មកកាន់ Catalonia ប៉ុន្តែមិនបានសម្រេច។ ឥឡូវនេះ នៅពេលដែលទីផ្សារដោះដូរកីឡាកររដូវរងាដ៏សំខាន់ខិតជិតមកដល់ Barcelona បានបង្ហាញពីចំណាប់អារម្មណ៍យ៉ាងខ្លាំងក្លារបស់ខ្លួនទៅកាន់កីឡាកររូបនេះម្តងទៀត។

តាមសេចក្តីរាយការណ៍ ការពិភាក្សារវាងភាគីពាក់ព័ន្ធ និងក្រុមការងាររបស់ Bastoni នៅតែបន្តដំណើរការ។ Barcelona កំពុងស្វែងរកវិធីសាស្ត្រផ្សេងៗដើម្បីនាំយកខ្សែការពារកណ្តាលដ៏រឹងមាំរូបនេះ មកកាន់ប្រទេសអេស្ប៉ាញក្នុងពេលឆាប់ៗខាងមុខ។ យោងតាមប្រភពដដែល ក្លឹបនេះត្រៀមខ្លួនរួចជាស្រេចក្នុងការបង្កើនកិច្ចខិតខំប្រឹងប្រែងដើម្បីនាំយកកីឡាកររូបនេះឱ្យកាន់តែខ្លាំងក្លាថែមទៀតនៅក្នុងសប្តាហ៍ខាងមុខ។ ប្រភពដដែលបានបញ្ជាក់ថា Barcelona បានបញ្ជាក់ជាថ្មីអំពីបំណងប្រាថ្នារបស់ខ្លួនក្នុងការត្រៀមខ្លួនសម្រាប់យុទ្ធនាការថ្មីមួយទៀតដើម្បីនាំយកកីឡាកររូបនេះ។

មានសេចក្តីរាយការណ៍ថា ខ្សែការពារកណ្តាលរូបនេះធ្លាប់បានព្រមព្រៀងលើលក្ខខណ្ឌផ្ទាល់ខ្លួនរួចរាល់ហើយជាមួយ Barcelona ក្នុងអំឡុងពេលទីផ្សារដោះដូរកីឡាកររដូវក្តៅដ៏មមាញឹក។ ទោះជាយ៉ាងណាក៏ដោយ គ្រូបង្វឹក Hansi Flick បានសម្រេចចិត្តបញ្ឈប់ការផ្ទេរនេះនៅពេលនោះ៕