អនាគតរបស់ Endrick នៅក្លឹប Real Madrid កំពុងស្ថិតក្រោមការតាមដានយ៉ាងយកចិត្តទុកដាក់។ ខ្សែប្រយុទ្ធសញ្ជាតិប្រេស៊ីលរូបនេះ មិនសូវទទួលបានឱកាសលេងទៀងទាត់ទេចាប់តាំងពីរដូវកាលបានចាប់ផ្តើម ទោះបីជាគ្រូបង្វឹក Jose Mourinho បានទទូចរក្សាទុកគេ និងបិទឱកាសមិនឱ្យចាកចេញក្នុងអំឡុងពេលទីផ្សារដោះដូរកីឡាកររដូវក្តៅកន្លងទៅក៏ដោយ។

យោងតាមប្រភពពី Calciomercato បានឱ្យដឹងថា ក្លឹប AC Milan កំពុងតាមដានស្ថានការណ៍នេះយ៉ាងដិតដល់ ដើម្បីត្រៀមធ្វើការទាក់ទងម្តងទៀតនៅក្នុងខែមករាខាងមុខ។ ពួកគេសង្ឃឹមថានឹងទាញយកប្រយោជន៍ពីតម្រូវការរបស់ Endrick ដែលចង់បានឱកាសពិតប្រាកដដើម្បីបង្ហាញសមត្ថភាព ដោយផ្តល់ជូននូវទីកន្លែងដែលគេមិនអាចរកបាននៅរដ្ឋធានីនៃប្រទេសអេស្ប៉ាញមួយនេះ។ យោងតាមគេហទំព័រផ្លូវការរបស់ក្លឹប Endrick បានចូលលេងចំនួន ៥ ប្រកួតក្នុងរដូវកាលនេះ ដោយមានរយៈពេលសរុបត្រឹមតែ ១១១ នាទីប៉ុណ្ណោះ ហើយក្នុងនោះគេបានចូលលេងជាជម្រើសដំបូងតែម្តងគត់។

គួរបញ្ជាក់ផងដែរថាក្លឹប Roma, Aston Villa និង Arsenal សុទ្ធតែមានចំណាប់អារម្មណ៍ចង់បានកីឡាករជនជាតិប្រេស៊ីលរូបនេះដូចគ្នា។ សម្រាប់ Endrick ការផ្លាស់ទៅកាន់ក្លឹប Milan អាចជាឱកាសដើម្បីទទួលបានតួនាទីសំខាន់ និងពេលវេលាចូលលេងគ្រប់គ្រាន់សម្រាប់បន្តការអភិវឌ្ឍខ្លួន ជាជាងការទទួលយកឱកាសចូលលេងបានតែម្តងម្កាលនៅ Real Madrid។ អ្វីៗទាំងអស់គឺអាស្រ័យទៅលើជំហររបស់ក្លឹបអេស្ប៉ាញមួយនេះ និងឆន្ទៈរបស់កីឡាករក្នុងការស្វែងរកឱកាសដ៏ធំជាងមុន៕