លោក Sergio Conceicao នឹងមិនចូលមកដឹកនាំក្រុម Fenerbahce នោះទេ។ អតីតអ្នកចាត់ការក្រុម AC Milan រូបនេះ ដែលមិនទាន់មានក្រុមដឹកនាំចាប់តាំងពីចាកចេញពីក្លឹប Al Ittihad មក បានបដិសេធសំណើពីក្លឹបតួគីមួយនេះ។ ក្រុម Fenerbahce កំពុងស្វែងរកអ្នកចាត់ការថ្មី បន្ទាប់ពីលោក İsmail Kartal បានលាលែងពីតំណែង។ មូលហេតុនៃការសម្រេចចិត្តរបស់អ្នកចាត់ការសញ្ជាតិព័រទុយហ្គាល់រូបនេះ មិនមែនពាក់ព័ន្ធនឹងរឿងលុយកាក់នោះទេ ប៉ុន្តែលោកចង់រង់ចាំសំណើពីក្លឹបណាមួយដែលស្ថិតនៅក្នុងលីគកំពូលទាំង ៥ នៃទ្វីបអឺរ៉ុប។ លោក Conceicao ក៏បានថ្លែងអំណរគុណដល់ក្លឹប Fenerbahce ចំពោះសំណើនេះផងដែរ។

បច្ចុប្បន្ន លោក Dirk Kuyt កំពុងកាន់តួនាទីដឹកនាំក្រុមនៅក្លឹបដែលមានមូលដ្ឋានក្នុងទីក្រុង Istanbul មួយនេះ។ អតីតខ្សែប្រយុទ្ធក្រុម Liverpool រូបនេះ ធ្លាប់លេងឱ្យក្រុម Fenerbahçe ចន្លោះឆ្នាំ ២០១២ ដល់ ២០១៥។ បុរសសញ្ជាតិហូឡង់រូបនេះ កំពុងធ្វើជាអ្នកចាត់ការបណ្តោះអាសន្ន រហូតទាល់តែក្លឹបស្វែងរកបានអ្នកចាត់ការថ្មី ដោយលោកបានចូលរួមជាមួយក្រុមតាំងពីដំណាក់កាលមុនបើករដូវកាល ក្នុងនាមជាជំនួយការរបស់លោក Kartal។ លោកនឹងដឹកនាំក្រុម Fenerbahçe សម្រាប់ការប្រកួតពានរង្វាន់ Champions League នៅថ្ងៃស្អែក ទល់នឹងក្រុម Liverpool។

ប្រព័ន្ធផ្សព្វផ្សាយនៅប្រទេសតួគីរំពឹងថា ក្រុម Fenerbahçe នឹងតែងតាំងលោក Emre Belözoğlu ដែលជាអតីតខ្សែបម្រើរបស់ក្លឹប Inter និង Fenerbahçe ផ្ទាល់តែម្តង ឱ្យមកកាន់តំណែងនេះ។ លោកនឹងចាកចេញពីតួនាទីជាអ្នកចាត់ការក្រុម Kasimpasa ដើម្បីត្រឡប់ទៅកាន់កីឡដ្ឋាន Şükrü Saracoğlu វិញ ដែលកន្លែងនោះលោកធ្លាប់ធ្វើជាអ្នកចាត់ការបណ្តោះអាសន្នម្តងរួចមកហើយកាលពីឆ្នាំ ២០២១។ គេរំពឹងថា លោកនឹងចុះកិច្ចសន្យាជាមួយក្លឹបនៅចន្លោះថ្ងៃនេះ ឬថ្ងៃស្អែក៕